வெங்காய போண்டா எப்படி செய்வது?
சுவையான மொறுமொறு வெங்காய போண்டாவை வீடுமுறையில் வீட்டில் இருக்கும் குழந்தைகளுக்கு செய்துகொடுக்கலாம் வாங்க எப்படி செய்யலாம் என பார்ப்போம்.
இதற்கு தேவையான பொருட்கள்:
பெரிய வெங்காயம் – 4, கடலை மாவு – அரை கப், அரிசி மாவு – ஒரு டேபிள்ஸ்பூன், மிளகாய்த்தூள் – அரை டேபிள் ஸ்பூன், பெருங்காயத்தூள் – கால் ஸ்பூன், பச்சை மிளகாய் – 2, உப்பு – தேவையான அளவு, கறிவேப்பிலை – 2 கொத்து, சமையல் எண்ணெய் – தேவையான அளவு எடுத்துக் கொள்வேண்டும்.
செய்முறை விளக்கம்:
வெங்காய போண்டா செய்வதற்கு முதலில் பெரிய வெங்காயம் நான்கு என்கிற எண்ணிக்கையில் எடுத்து அதன் தோலை உரித்து வைத்துக் கொள்ளுங்கள். பின்னர் ரொம்பவும் மெல்லியதாக பச்சடிக்கு வெட்டுவது போல நீளவாக்கில் எல்லா வெங்காயத்தையும் நறுக்கி தனித்தனியாக கைகளால் உதிர்த்து வைத்துக் கொள்ளுங்கள்.
வெங்காயம் நீளவாக்கில் நறுக்கும் பொழுது தான் அதை சாப்பிடும் பொழுது ரொம்பவே சுவையாக இருக்கும். நறுக்கி வைத்த வெங்காயத்துடன் அரை கப் அளவிற்கு கடலை மாவு சேர்த்துக் கொள்ளுங்கள். கடலை மாவுடன் ஒரு டேபிள்ஸ்பூன் அளவிற்கு அரிசி மாவு, ஒரு டேபிள்ஸ்பூன் அளவிற்கு வெறும் மிளகாய்த்தூள் சேர்த்துக் கொள்ள வேண்டும். எண்ணெய் பதார்த்தங்கள் செய்யும் பொழுது கண்டிப்பாக பெருங்காயத்தூள் சேர்க்க வேண்டும்.
கால் டீஸ்பூன் க்கும் குறைவாக கொஞ்சமாக பெருங்காயத் தூள் சேர்த்துக் கொள்ளுங்கள். காரத்திற்கு இரண்டு பச்சை மிளகாய்களை எடுத்து காம்பு நீக்கி சுத்தம் செய்து பொடி பொடியாக நறுக்கிச் சேர்த்துக் கொள்ளுங்கள்.
பின் 2 கொத்து கறிவேப்பிலையை பச்சை பசேலென உருவி பொடிப்பொடியாக நறுக்கி சேர்த்துக் கொள்ளுங்கள். பின்னர் இதற்கு தேவையான அளவிற்கு உப்பு போட்டு நன்கு கலந்து வைத்துக் கொள்ளுங்கள். இப்போது தண்ணீரை கொஞ்சம் கொஞ்சமாக தெளித்து போண்டா மாவு பதத்திற்கு எல்லாவற்றையும் சேர்த்து நன்கு கலந்து உருண்டைகள் பிடிக்க வேண்டும். சிறு சிறு உருண்டைகளாக நன்கு அழுத்தம் கொடுத்து பிடித்து வைத்துக் கொள்ளுங்கள்.
எல்லா மாவையும் உருண்டைகள் பிடித்த பின்பு அடுப்பை பற்ற வைத்துக் கொள்ளுங்கள். அதில் ஒரு வாணலியை வைத்து தேவையான அளவிற்கு எண்ணெய் ஊற்றி நன்கு காய விடுங்கள். எண்ணெய் நன்கு காய்ந்ததும் அடுப்பை மீடியமாக வைத்து கொண்டு ஒவ்வொரு உருண்டைகளையும் போட்டு பொறுமையாக எல்லா புறமும் ஒன்று போல சிவக்க வறுத்து எடுக்க வேண்டும். இப்போ சுவையான வெங்காய போண்டா ரெடி
